Schön isches wieder gsi. Mits Sunne, Räge und schöne Farbe am Himmel. 

Am Samstig simmer uf de Walchwiler Bärg. Es Stückli simmer gloffe und nachher isches losgange mit schleppe und ufstelle. Nachher hemmer es feins Znacht gha und hend de Abig versuecht mit singe am Lagerfüür verbringe jedoch isch eus de Räge es paar mal dezwüsche choh.

Am Sunntig hemmer en chlini Wanderig gmacht zunere Brötlistell wo mer Feini Hamburger gässe hend. Als Dessert hets Marshmallows überem Füür mitem sälber gsuechte Stäcke geh. Es Schitli-Vertschutis het natürlich au ned dörfe fähle. Grab bim abmarsch zrugg hetts möge ahfah Rägne und mer sind es biz nass worde. Ahchoh bim Zältplatz hend d Chind Freiziit gha und d Leiterinne s Znacht afah choche. De Räge het eus de aber es paar mal ih eusi Zält gjaggt.

Am Sunntig hämmer chli länger dörfe schlafe und de anes feins Zmorge sitze. Nach de Sandwichuswahl fürs Zmittag isches schoh los gange mitem Abbau. D Chind hend fliisig d Sache putz, versorgt und zum Auto transportiert. Nachher isches ufe Heiwäg gange und es het no paar Spieli geh bim Ussereggspielplatz. 

Mer Hoffed euch alli nächst Jahr wieder zgseh. Für eus gahts wiiter mit de Vorberietige fürs Sola!

Euches Leiterteam