Am Samstig simmer übere Artherberg uf Arth zu üsem Zeltplatz gloffe. Womer alles ufgstellt hend, sind üs s Fränzi und de Benjamin go bsueche und hend üs allne es Glace spendiert. Nach feine Älplermagrone hemmer alli zäme am Lagerfüür gsunge und d Schoggi-Banane gnosse.

Am Sunntig simmer mit em Bähndli uf d Seebodenalp gfahre und hend binere schöne Brötelstell im Schatte Zmittag gesse. Am Namitag simmer trotz de warme Temperature de Chugelibahn-Weg gloffe und hend di wunderschöni Natur und d Ussicht bestuunt. Womer wieder bim Lagerplatz acho sind, hend d Chind chli Friziit gah und d Leiterinne hend s Znacht vorbereitet.

Und scho isches wieder Mäntig gsi und s Ufruume isch ahgstande. Alli hend mit ahpackt und mitghulfe, dass mir schnell alles packt und im Auto versorgt gah hend. Nachem Zmittag hemmer es paar Spieli gspielt und üs mitere Wasserschlacht abküelt. Wieder in Walchwil ahcho, hemmer üs mitem Tschüss-Chreis verabschided.

Mir hoffed üch alli nächst Jahr wieder z gseh und freued üs jetzt scho ufs Sola! Maja und s Leitigsteam vom Blauring Walchwil